ՋԱՎԱԽՔԻ ՀԱՄԱՑԱՆՑԱՅԻՆ ՊՈՐՏԱԼ

Մարտ (նյութերի քանակը` 2, վերջին թարմացումը` 18:34, 28.03.2012)

<<Վերևից>> զանգել-զգուշացրել են չներկայանալ հանդիպմանը>>

28 մարտի 2012 թ.

Սամցխե - Ջավախքի հայկական հասարակական կազմակերպությունների խորհրդի համակարգող Արտակ Գաբրիելյանի Բրյուսելում Եվրոպական խորհրդարանի մի շարք պատգամավորների և պաշտոնյաների հետ ունեցած հանդիպումները առիթ տվեցին ամենատարբեր մեկնաբանությունների:

Այդ նպատակով Սամցխե-Ջավախքի հայկական հասարակական կազմակերպությունների խորհուրդը կազմակերպել էր ընդլայնված հանդիպում` նպատակ ունենալով հանրությանը ներկայացնել իրականությունը առաջին դեմքից: Իսկ թե ինչի վերածվեց այս նախաձեռնությունը` ամենևին ծիծաղելի էր:

Սկսենք նրանից, որ հանդիպմանը, ինչպես հավաստիացրեցին կազմակերպիչները, հրավիրված էին շրջանների բոլոր ղեկավարները, իրենց տեղակալների հետ միասին, մարդու իրավունքների պաշտպանի Ախալքալաքի գրասենյակի պատասխանատուն, ինչպես նաև բազմաթիվ հասարակական, երիտասարդական, պետական, մշակութային և այլ կազմակերպություններ, միություններ և լրատվամիջոցներ: Եվ սա վերաբերում է ոչ միայն Ախալքալաքի շրջանին, այլ նաև Նինոծմինդայի, Ախալցխայի և Ծալկայի շրջաններին:

Հադիպման դեռ սկզբում շատերը զանգահարում և տեղեկացնում էին, որ չեն ներկայանա հանդիպմանը, քանի որ «վերևից» զանգել-զգուշացրել են: Թույլ չէին տվել հանդիպումը կազմակերպել նաև քաղաքի դահլիճներից որևէ մեկում: Չնայած նախնական համաձայնությանը, համաձայնելուց րոպեներ հետո ամենատարբեր պատճառաբանություններով բոլորը հրաժարվել էին տեղ տրամադրել հանդիպումն անցկացնելու համար: Արտակ Գաբրիելյանը սա պայմանավորեց ուժային կառույցների ուղղակի ճնշումների հետ, ինչը, իր իսկ խոսքերով, ևս մեկ անգամ հաստատում է իրենց նախաձեռնության կարևորությունը և ցույց է տալիս այն լրջագույն վիճակը, որում հայտնվել ենք: Արդյունքում, ընդամենը 30 հոգով /ովքեր ՍՋՀՀԿ խորհրդի անդամներ են/ հանդիպումը կայացավ Ա-ԻՆՖՈ լրատվական գործակալության փոքրիկ գրասենյակում:

Արտակ Գաբրիելյանը նշեց, որ խորհրդի կողմից պատրաստվել էր հուշագիր, հինգ սկզբունքային կետերով, որում ներկայացված է տարածաշրջանում առկա խնդիրները և դրանց լուծման ճանապարհները: Այդ հուշագիրը ներկայացվել է Եվրոպական խորհրդարանի երկու տասնյակի հասնող այն բոլոր պատգամավորներին և պաշտոնյաներին ում հետ հաջողվել է հանդիպել Բրյուսելում: Հուշագրի սկզբունքային կետերն են.

1. Վերջ տալ երկրամասի ժողովրդագրական պատկերը փոխելու ճիգերին

2. Տեղական և պետական կառավարման կառույցներում բարելավել հայերի ներկայացվածությունը

3. Սոցիալական և տնտեսական զարգացման ծրագրեր մշակել և իրականացնել երկրամասում, դրա մակարդակը այդ բնագավառներում հավասարեցնելու համար երկրի մնացյալ շրջանների վիճակին

4. Ազգաբնակչության հայ մեծամասնություն ունեցող վարչական շրջանների կառավարման մարմիններում հայոց լեզվի օգտագործման իրավունք տալ

5. Վրաստանի կազմում ինքնավար տարածքային միավորի կարգավիճակ տալ Սամցխե-Ջավախքի և հարակից Ծալկա շրջանին

Խոսելով հանդիպմանը հերթական անգամ չներկայացած տեղական ղեկավարության մասին, Ա. Գաբրիելյանը ափսոսանք հայտնեց, նշելով, որ շատ ավելի լավ կլիներ, եթե վերջիններս ներկա գտնվեին ու անձամբ լսեին ինչ նպատակ են հետապնդել Բրյուսելյան հանդիպումները և ինչ արդյունք են տվել, քան թե այդ ամենի մասին տեղեկանային ամենատարբեր լրատվամիջոցներից, ինչը բազմաթիվ թյուրիմացությունների տեղիք տվեց:

Շարունակելով իր խոսքը, Գաբրիելյանը կրկնեց բազմաթիվ անգամ հնչեցրած այն համոզմունքը, որ Վրաստանը պետք է դառնա լիարժեք ֆեդերալ պետություն, նշելով, որ այս մտքի հետ համամիտ են նաև Եվրոպական խորհրդարանի բազմաթիվ պատգամավորներ: Եվ այս ֆեդերալ կառուցաձևում Ջավախքի ապագան, անվտանգությունը, զարգացումն ու ժողովրդավարությունը Սամցխե-Ջավախքի և հայկական հասարակական կազմակերպությունների խորհուրդը տեսնում է Վրաստանի կազմում միայն ինքնավարության մեջ:

ԱԽԱԼՔԱԼԱՔ, 27 ՄԱՐՏ 2012թ, Ա-ԻՆՖՈ

Լրահոսը` http://7or.am

Ջավախքին ինքնավարության տրամադրումը կլուծի տարածաշրջանի բազմաթիվ խնդիրները

19 մարտի 2012 թ.

Սամցխե-Ջավախք տարածաշրջանի խնդիրների լուծման բանալին նրան ինքնավար կարգավիճակի տրամադրումն է: Այդ մասին հայտարարել է Տարածաշրջանի հայկական հասարակական կազմակերպության խորհրդի համակարգող, «Ա-ԻՆՖՕ» տեղեկատվական գործակալության տնօրեն Արտակ Գաբրիելյանն, այսօր` մարտի 19-ին կայացած ասուլիսի ժամանակ:

Խորհրդի համակարգողը հայտնել է, որ վերջերս այցելել է Բրյուսել և մի շարք հանդիպումներ ունեցել, մասնավորապես Եվրախորհրդարանի ներկայացուցիչների հետ: Քննարկումների հիմնական խնդիրը վերաբերել է տարածաշրջանին ինքնավար կարգավիճակ տրամադրելու անհրաժեշտության, հայոց լեզվին տարածաշրջանային կարգավիճակ տրամադրելու հարցերին, ժողովրդագրական և սոցիալական խնդիրներին, մարդու իրավունքների, ազգային

փոքրամասնությունների հանդեպ խտրականության քաղաքականության իրականացման հարցերին: Գաբրիելյանը տարածաշրջանի գլխավոր սպառնալիքներից է համարում այն, որ երկաթուղու շինարարության կապակցությամբ առաջացել է թուրքական էքսպանսիայի վտանգ, իսկ տարածաշրջանին ինքնավարություն տրամադրելը կչեզոքացրեր դա:

Գաբրիելյանի խոսքով, եվրոպական խորհրդարանականներն ըմբռմամբ են մոտեցել այդ հարցերի կարեւորությանը եւ զարմանք հայտնել, որ ավելի վաղ դրանք եվրոպական մակարդակով չեն բարձրաձայվել: Այդ առթիվ Գաբիրելյանը երկու հանգամանք է նշել` առաջին, Ջավախքի ներկայացուցչի համար դժվար է հասնել Եվրոպա, բացի այդ, ջավախեցիները փորձել են հարցը լուծել Վրաստանի իշխանությունների հետ:

Խորհրդի համակարգողի խոսքով, տարածաշրջանում վրացերենի լիակատար ուսուցման համար անհրաժեշտ է տարածաշրջանում ստեղծել կենտրոններ, և հարցի լուծմամբ պետք է զբաղվեն երկրի իշխանությունները: Այն հարցին, թե ինչու ջավախեցիները մինչ այժմ վրացերեն չեն սովորել` Գաբրիելյանը նշել է, որ հանգամանքների բերումով դրա անհրաժեշտությունը չի եղել, քանի որ տարածաշրջանում հայերը կոմպակտ ձևով են բնակվում: «Ջավախեցիները մեղավոր չեն, որ չգիտեն վրացերեն: Նախկինում անհրաժեշտություն չի եղել, չկան նաև համապատասխան կրթական հաստատություններ», - հայտարարել է Գաբրիելյանը:

Նրա խոսքով, Վրաստանի կառավարությունը Եվրոպայից և միջազգային կազմակերպություններից ստացած գումարները ծախսում է Թբիլիսիի և այլ շրջանների վրա, իսկ Ջավախքին ոչինչ չի հասնում: Ընդգծելով, որ Խորհուրդը հանդես է գալիս Վրաստանի տարածքային ամբողջականության օգտին` Գաբրիելյանը նաև հայտարարել է երկրի դաշնային բնույթի և ազգային փոքրամասնություններին ինքնավարության տրամադրման անհրաժեշտության մասին: «Խնդիրները միայն հայկական համայնքինը չեն, ազգային մյուս փոքրամասնություններն, ասենք ադրբեջանցիները, ևս ունեն խնդիրներ», - նշել է Խորհրդի համակարգողը` կրկին ընդգծելով, որ Ջավախքի խնդիրները մեծամասամբ քաղաքական ենթատեքստ ունեն, և տարածաշրջանին ինքնավարության տրամադրումը կլուծի բազմաթիվ հարցեր:

Լրահոսը` http://news.am

Նախորդ ամիսների նորությունները նայեք «ԼՈՒՐԵՐԻ ՊԱՀՈՑ» էջում

Կարող էք նայել նաև նախորդ տարիներ արխիվը «ԼՈՒՐԵՐԻ ՊԱՀՈՑ» էջի օրացույցի օգնությամբ

1) Աշխատանքի հրավեր: Հրավիրում ենք աշխատանքի բոլորին` առանց նախապայմանների, ազատ աշխատանքային գրաֆիկով, առանց սեռի և տարիքային սահմանափակման, բարձրագույն կրթության, օտար լեզվի և համակարգչի իմացության գովազդային գործակալներ աշխատելու համար:
2) Ջավախքի գյուղերում և շրջկենտրոններում թղթակիցներ ունենալու նպատակով աշխատանքի ենք հրավիրում ազատ աշխատանքային գրաֆիկով տեղերում բնակվող բարձրագույն բանասիրական կրթությամբ, համակարգչին տիրապետող (տեղեկությունները էլեկտրոնային տարբերակով մեզ ուղարկելու համար) անձանց:

2012 թվականի նորությունները

Մարտ (նյութերի քանակը` 2, վերջին թարմացումը` 18:34, 28.03.2012)

Նախորդ ամիսների նորությունները նայեք «ԼՈՒՐԵՐԻ ՊԱՀՈՑ» էջում

Հայտարարություններ

Գովազդ